Verkefnið er að búa til einfalda hreyfimynd sem er gerð í samvinnu hópsins. Hér voru notaðir byggingar og hlutir sem lýst er í verkefninu SKUGGABORG.
Fyrst er að stilla upp fyrir tökuna. Strengt er upp stórt tjald. Öðrum megin við tjaldið er pallur sem byggingunum er raðað á og snúra (eða snúrur)þar fyrir ofan þar sem hægt er að hengja upp hluti sem eiga að vera fyrir ofan borgina. Hér eru líka lampar og/eða myndvarpi. Hinum megin við tjaldið er stillt upp borði með tölvu og vefmyndavél. Myndavélin er stillt þannig að tjaldið passi í ramma myndavélarinnar.
Áður en hafist er handa við að taka myndina þarf að kynna nemendum hreyfimyndaforritið, sem á að nota, og hvernig það virkar. Hvernig röð ljósmynda myndar hreyfingu þegar forritið í tölvunni spilar þær saman. Best er að leyfa nemendum að gera tilraunir áður en farið er í taka sjálfa myndina.
I. Borg verður til
Nemendur setjast á gólfið fyrir framan tjaldið (þeim megin sem myndavélin er). Þeir skiptast svo á að fara hinum megin við tjaldið og stilla upp byggingum og öðrum hlutum í borgina og stýra mynatökunni í tölvunni. Myndatakan fer þannig fram að nemendur koma hver á eftir öðrum og stilla byggingunni sinni á pallinn og kveikja á lampa sem lýsir á hana þannig að komi skuggamynd á tjaldið. Þá er tekin mynd, næsti stillir upp sinni byggingu og lýsir upp, mynd tekin og þannig koll af kolli þangað til allar byggingarnar eru komnar í borgina. Þegar myndirnar eru spilaðar saman í heyfimyndaforritinu birtast byggingrnar ein af annari þangað til borgin er orðin til. Í myndatökunni er hægt að leika sér með lýsinguna, breyta henni jafnóðum og fá þannig meiri hreyfingu í myndina. Það er hægt að lýsa upp allt tjaldið með myndvarpa (hvítu ljósi eða lituðu) eða nota litla lampa og setja “spott” á byggingarnar. Hægt er að nota litafiltera á lampana og fá skugga í lit á tjaldið. Og það er hægt að búa til stjörnuhiminn með því að strengja svart karton á blindramma og setja á myndvarpa og stinga á það lítil göt.
II. Hreyfing í borg
Þegar borgin hefur verið reist er hægt að halda áfram og bæta við öllum hinum hlutunum og hengja á snúrurnar fyrir ofan. Þá er líka hægt að leika sér meira með hreyfingu í borginni. Láta fugla og farartæki fljúga um loftin blá, sólina koma upp og ganga til viðar og stjörnubjartan himininn taka við.... Það er líka hægt að stíga sjálfur inn í skuggann og leika risa sem kitlar lítinn fugl eða leikur sér að því að færa til byggingarnar i borginni. Möguleikarnir eru endalausir og um að gera að gefa ímyndunaraflinu lausan tauminn.
